Еліміздің бас қаласы Астана қаласында 10 маусым мен 10 қыркүйек аралығында халықаралық ЭКСПО-2017 көрмесі өтіп жатыр. Осынау тарихымызда ойып орын алатын тамаша сәтті 30 маусым күні мектеп ұжымы көзбен көріп қайттық. Осы жолғы елімізде өтіп жатқан халықаралық көрме «Болашақ энергиясы» деген тақырыпта өтуде. Бұл тақырыптың қозғалуы да тегін емес. Осынау жаһандану заманында өзімізде бар ресурстарды сарп етпей, қосалқы энергия көздерін ашу қажет екендігі түсінікті жайт. Қазақстан павильонындағы әр қабатта әртүрлі тақырып қамтылған. Сегіз қабат шыныдан жасалған ғимаратты аралап жүріп, түрлі арнайы әсер беретін қойылымдарды, құрылғыларды көріп таңдай қағып таң қалыстық. Өзге мемлекеттердің павильондарын аралаған сәтте құдды шет мемлекеттерде жүргендей әсер алып, олардың көрмеге қойған заттарын тамашалап, ұстап көретіндерін ұстап көріп, олардың мәдениеттері, салт-дәстүрлеріне, музыкасына тәнті болдық. Әрине бір күнде бар 115 мемлекеттің павильондарын аралап шығу мүмкін емес еді. Алайда біз оннан астам мемлекеттің павильондарын аралап өттік. Қорыта айтар болсам, сол уақытта көрмеде жүргенде бұл-менің елім, менің Астанам деген мақтаныш сезімі бойымызды кернеп, Елордамыздың күннен-күнге құлпырып, жаңарып, жайқалып келе жатқанына қуанып, керемет әсермен үйімізге оралдық.