Мемлекет басшысының ұлы ақын жайлы өрелі ойы
9 қаңтар күні Мемлекет басшысы Қ. К. Тоқаевтың «Абай және ХХІ ғасырдағы Қазақстан» атты мақаласы жарық көрді. Бұл мақалада Мемлекет басшысы қазақтың ұлы ақынының 175 жылдық мерейтойы қарсаңында өткізіліп жатқан іс-шаралар барысына тоқталып өтті. Болашақта қандай ауқымды жұмыстар жалғастырылатыны баяндалды. 30 мамыр күні қазақтың ұлы ақынының мерейтойын тойлау туралы Жарлыққа қол қойылғаннан бері біршама игі істер тындырылғаны тілге тиек етілді. Соның ішінде ақын өлеңдері мен қарасөздерін жатқа оқу эстафетасының (челлендж ) еліміздің түкпір-түкпірінде іске асқандығы айтылды. Тіпті Қасым-Жомарт Кемелұлының Ләйлім деген бүлдіршіннен эстафетаны қабыл алып, «Ғылым таппай мақтанба» өлеңімен халық алдына шыққандығы да баршамызға белгілі. Өз мақаласында Мемлекет басшысы ұлы ақынның қаншама өлең жолдарынан мысал келтіре отыра, бүгінгі заман тұрғысынан дәлелдер келтіріп талдау жасайды. Халқын білім-ғылым үйренуге, «пайда ойламай, ар ойлауға», адамгершілік, ізгі қасиеттерге жақын болуға шақырған ақын өлеңдерінің біз үшін аса құнды екендігін ашып көрсетеді.
Абай – қазақ халқы үшін ұлы ғұлама, асқан ойшыл. Әр шығармасы кез келген адамды қалың ойға жетелейді. Ақынның айтып кеткен ой-пікірі, даналық сөзінің астарында асқан тереңдік, ділмарлық жатқандай. XIX ғасырда өмір сүрсе де, дәл бүгінгі біздерге арналып айтылғандай дөп түскен ойлары бәрімізді таңғалдырады. Ендеше, ХХІ ғасыр ұрпағы, яғни біздер, Абайдай ұлы ақынның асыл сөздерін оқып, тереңіне бас қоюымыз керек. Абай сөздері ешқашан көнеленбейтін, өшпейтін сөздер екені хақ. Білімге, ғылымға ден қойып, көңіл көкжиегімізді кеңейтіп, заман ағымына ілесейік! Сонда ғана Абай армандап кеткен абыройлы ел, қалың қазақ болғанымыз деп білемін.